हत्यारालाई कार्वाही गर्न माग

आश गुरुङ 'प्रतीक'

लमजुङ, माघ ३ गते ।
अज्ञात समुहद्वारा हत्या गरिएका जनकपुरका पत्रकार उमा सिंहको हत्यारालाई तत्काल पत्ता लगाई कार्वाही गर्न लमजुङका पत्रकारहरुले सरकारसंग माग गरेकाछन् । हत्यावारे निश्पक्ष छानविन गठन गर्नुपर्ने लगायत आठ बुँदे माग राखि नेपाल पत्रकार महासंघ लमजुङ शाखाको अगुवाईमा लमजुङका पत्रकारहरुले आज विहिवार प्रमुख जिल्ला अधिकारीमार्फ प्रधानमन्त्री पुष्पकमल दाहाल 'प्रचण्ड' लाई ज्ञापनपत्र समेत बुझाएकाछन् ।
पत्रकारहरुले उमा सिंह र जेपी जोशी लगायतका पत्रकारहरुको हत्यामा संलग्न अपराधीहरुलाई कारवाही गर्नुपर्ने, पीडित परिवारलाई उचित क्षतिपूर्ति र राहत सहित शहीद घोषणा गर्नुपर्ने, बेपत्ता पत्रकार मिलन नेपाली र प्रकाश ठकुरीको खोजी गर्नुपर्ने, पत्रकार तथा सामान्य नागरिकको हत्या हिंसाको श्रृंखला बन्द गर्नुपर्ने, विधिको शासन कायम गरी दण्डहीनताको अन्त्य गर्नुपर्ने, पत्रकारको भौतिक, आर्थिक र सामाजिक सुरक्षाको ग्यारेन्टी गर्नुपर्ने, पत्रकार श्रम ऐन छिटो लागु गर्नुपर्ने लगायतका माग गरेका छन् ।
पत्रकारिता आवाज विहिनको आवाज भएकोले उनीहरुको पक्षमा कलम चलाउने पत्रकार माथि अपहरण, कुटपिट र हत्या भैरहेकोमा सिंगो सञ्चार जगत नै मर्माहत बनेको भन्दै पत्रकारहरुले देशमा शान्ति कायम भएको भन्ने कुरा केबल शब्द र भाषणमा मात्रै सिमित बनेको वताएकाछन् । सरकार घटनालाई मथ्थर पार्ने हेतुले झाराटारा तरिकाबाट आयोगमात्र गठन गर्ने काम गरेको र घटनाको छानविन गर्ने, माफी माग्ने आलेटाले कुरामा पत्रकारहरुलाइ झुक्काएर हत्यारालाई कानुनी कारबाही गर्न पन्छिएको समेत आरोप लगाएकाछन् ।

Posted on:January 15, 2009, 5:14 am