लमजुङमा इलमपोखरी महोत्सव सम्पन्न

आश गुरुङ 'प्रतीक',

लमजुङ, फागुन २५ गते ।
पूर्बी लमजुङको विकट मानिने ईलमपोखरीमा आयोजना गरिएको दोश्रो ईलमपोखरी महोत्सव २०६५ आज शनिवार सकिएको छ ।
'प्राकृतिक श्रोत साधनहरुको अधिकतम उपयोग गरौँ, आन्तरिक तथा बाहृय पर्यटनको प्रवर्द्धन गरौँ, ऐतिहासिक स्थल, स्थानीय कला संस्कृतिको संरक्षण र संवर्द्धन गरौँ' भन्ने मुल नाराका साथ आयोजना गरिएको महोत्सव गत मंगलवारवाट शुरु भएको थियो ।
लमजुङ सदरमुकाम वेसीशहरवाट मुस्किलसंग एक दिनमा पुग्न सकिने ईलमपोखरीमा आयोजना गरिएको महोत्सवमा स्थानीय गुरुङ तथा तामाङ जातीको भेषभूषा, झाँकी, स्थानीयस्तरमा उत्पादित राडीपाखी, बख्खु, थुन्से, भकारी, नाङला, साथै जडिवुटी र पुशपन्छी, स्थानीय खाना लगायतको पर््रदर्शन गरिएको थियो ।
ईलमपोखरी क्षेत्रको ९ वटा गाविसमा अन्तरिक तथा बाहृय पर्यटन प्रवर्द्धन, स्थानीय कला संस्कृतिको संरक्षण र स्थानीयवासिन्दाको जिवनस्तर उकास्न महोत्सवको आयोजना गरिएको महोत्सवको ३० हजार दर्शकल अवलोकन गरेको आयोजक समितिले जनाएको छ ।
महोत्सवमा आएका पाहुनालाई गुरुङ तथा तामाङ जातीको प्राचिन वस्ती, तालतलैया, कोट, मन्दिर, हिमश्रृङ्खला, जंगली जनावर, पशुपन्छी, ठूलाठूला घाँसे मैदान लगायतको अवलोकनका लागि विशेष ब्यवस्था मिलाईएको थियो । महोत्सवमा राष्ट्रिय कलाकार भीम दुरा, चन्द्रा गुरुङ, दुर्गा गुरुङ, दुर्गा गुरुङ (तनहुँ), टीका गुरुङ, माधव भण्डारी, आशराम गुरुङ लगायतले लोक तथा दोहोरी गीत प्रस्तुत गरेका थिए । त्यस्तै चुनु शिल्प सांस्कृतिक परिवारले गीत तथा नृत्य प्रस्तुत गरेका थिए । महोत्सवमा २० वटा स्टल राखिएको थियो । स्टलमा स्थानीयस्तरमा उत्पादित हस्तकलाका सामाग्री, जडिवुटी लगायत कृषिजन्य सामाग्रीको प्रदर्शनी गरिएको थियो । महोत्सवमा २८ वटा होटल राखिएको थियो । महोत्सवमा निमावि स्तरीय नृत्य प्रतियोगिता साथै विविध खेलकुदका कार्यक्रम संचालन गरिएको थियो । महोत्सवमा निम्त्याईएको विशेष पाहुनालाई इलमपोखरीको चिनोस्वरुप गल्बन्दी लगाएर सम्मान समेत गरिएको थियो ।
महोत्सव ईलमपोखरी क्षेत्र संरक्षण तथा विकास मञ्चको पहल तथा जिल्ला विकास समिति लमजुङ र ईलपोखरी क्षेत्रमा पर्ने इलमपोखरी, विचौर, दूधपोखरी, कोल्की, गौँडा, प्यारजुङ, पाचोक र नौथर गरि ९ वटा गाविसको आयोजनामा भएको हो ।

Posted on:March 8, 2009, 8:05 am