कुट्की तस्करमा संलग्न १४ जना प्रहरी नियन्त्रणमा

आश गुरुङ 'प्रतीक'

लमजुङ, असोज ४ गते ।
अन्तराष्ट्रिय विदेश प्रकृति संरक्षण संघले अत्यान्तै लोपुन्मुख श्रेणीमा राखेको बहुमुल्य जडिवुटी कुट्कीलाई अबैध रुपमा संकलन गरिरहेका १२ महिलासहित १४ जनालाई लमजुङका प्रहरीले पक्राउ गरि नियन्त्रणमा लिएको छ ।

गोरखा जिल्ला लाप्राक गाउँ विकास समितिका १३ र लमजुङका एकजनालाई प्रहरीले लमजुङको बन्सार गाउँ विकास समिति वडा नं. ५, हिलेवेसीवाट हिजो पक्राउ गरि गएराती जिल्ला प्रहरी कार्यालयमा ल्याएको हो ।




पक्राउ पर्नेमा गोरखा जिल्ला लाप्राक गाउँ विकास समिति वडा नं. ६, का कान्छी गुरुङ, सुनिता गुरुङ, माया गुरुङ, मनकुमारी गुरुङ, प्रतिमा गुरुङ, आस्नी गुरुङ, अनार्ता गुरुङ, छल्ली गुरुङ, अनार्ता गुरुङ -सानी), पूर्नानी गुरुङ, वडा नं. ९ का सुनी गुरुङ, वडा नं. ३ का उर्नी गुरुङ, वडा नं. १ का धनबहादुर गुरुङ र लमजुङ बन्सार गाउँ विकास समिति वडा नं. ५, हिलेवेसीका गमबहादुर घले रहेकाछन् ।


गोरखा बजारमा वसोवास गर्ने जडिवुटीका ठेकेदार दीपक पाण्डेको निर्देशनमा २२ दिनदेखि लमजुङको ढोडेनीस्थित उच्च भेगको जंगलमा जडिवुटी संकलन गरि र्फकने क्रममा प्रहरीले उनीहरुलाई पक्राउ गरेको प्रहरी नायब उपरीक्षक प्रकाश अधिकारीले जानकारी दिनुभयो ।
प्रहरीले उनीहरुवाट करीब चारसय किलोग्राम कुट्की समेत बरामद गरेको छ । प्रति किलो १० रुपैँया सरकारी राजस्व तोकिएको कुट्कीको बजारी मुल्य तीनसय ५० देखि चारसय रुपैँयासम्म पर्दछ । समुन्द्री सतहदेखि तीनहजार देखि चारहजार मीटरसम्म पाईने कुट्की ज्वरो, रुघाखोकी, कमलपित्त, निमोनिया, सुगर लगायत २० भन्दा बढी रोगहरुको निदानका लागि औषधीको रुपमा प्रयोग गरिने जडिवुटी भएको जिल्ला बन अधिकृत रामकाजी श्रेष्ठले वताउनुभयो ।


बरामद गरेको कुट्कीको जरालाई स्थानीय प्रायोजनका लागि जम्मा पारिएको भन्दै एकीकृत माओबादी र्इलाका नं. ८ कार् इन्चार्ज एवं वाईसीएल कार्यकर्ता कृष्णकान्त पन्त र बसन्त मौरतीको नेतृत्वको खटिएका खटिएका कार्यकर्ताले ल्याउन नदिई अवरोध खडा गरेका थिए । उनीहरुको अवरोधका बाबजुतपनि प्रहरीले बल प्रयोग गरि ल्याएको जिल्ला बन कार्यालय लमजुङका सहयाक अधिकृत ताराबहादुर गुरुङले वताउनुभयो ।


जिल्ला बन कार्यालयका सातजना कर्मचारी र चिती प्रहरी चौकीवाट खटिएका तीनजना प्रहरीले कुट्कीलाई कब्जामा लिएपनि सदरमुकाम ल्याउन नसकेका कारण प्रहरी निरीक्षक बसन्त रञ्जितकारको नेतृत्वमा थप २० जना प्रहरी खटाएर ल्याईएको जिल्ला प्रहरी कार्यालयले जनाएको छ ।


पक्राउ गरिएकाहरुलाई बन ऐन अन्तरगत कानुनी कार्वाही गरिने जिल्ला बन कार्यालयले जनाएको छ ।

Posted on:September 20, 2009, 12:22 am